Pandacaque, Mexico, Pampanga
History
Inyang ika-12 ning Hunyo 1991, milyari ing e asahan a kalamidad kareng memalen kapampangan keti king lalawigan ning Pampanga, iti ya ing pamanakbung ning Bulkang Pinatubo. Dakal a kasiran ing mengapalyari uli na ning Lahar a minagus manibat king babo ning bulkan. Dakal lang bale ring mengatambunan at mikutkut. Mengasira la at alang mitagan king kabyayan da reng tawu. Kanitang kalamidad a dintang, mesubuk ing kasalpantayanan da reng memalan kapampangan, uling king panaun a ita, balamu mapupus ne ing yatu para karela uli na ning kasakitan at kasiran a mengapalyari. Agpang king geographical location, ing Balen ning Bacolor ya ing meging “catch basin” o lugal nung nu karin mitipun at minagus ing lahar. Kanita murin dineklara de ing State of Calamity king balen Bacolor at alus ding manuknangan karin, linikas dala karing miyayaliwang lugal a inawus dang “Resettlement Areas”. Metung kareng mitalakad Resettlement Areas ing Pandacaqui, a nung nu dati yang pitamnanan atbu at mais, king malaguang salita metung yang agricultural land.
Keti, pigumpisan de reng tau ing pamitalakad dang pasibayu karing karelang pibale-bale at kabiayan bilang metung a komunidad. Maragul la kapasalamatan reng memalen ninig baryu Pandacaqui uling iti ya ing memye pag-asa king balang metung ban talakad at magumpisang pasibayu. Kanita mu rin mipasyag ing matibe dang kasalpantayan ding tau, inya kayabe ning pamagumpisa ra king bie, at ban mibie ing kapasalamatan da king Guinu, king pamanimuna da ring mamuntukan ning baryu Pandacaqui, kasaup ing kura paroko ning Parokya nang San Miguel, Anao, Mexico, Pampanga, i Reberendo Padre Venancio D. Viray, mika regular a Santa Misa. King panahun a ita magaganap ing Santa Misa king metung mung dalungdung, a nung nu makatalakad ya ngeni ing pisamban.
Milabas ing mapilan banwa, mitalakad neman ing Parokya ning Cristong Ari king Pulung Cacutud, Angeles, at kanita miyabe ya king sasakupan na ing baryu ning Pandacaqui. I Reberendo Padre Nicolas D. Ulengco ya ing makatalagang kura paroko kanitang panahun a ita.
King pamagtas ning bilang ning populasyun ning komunidad, apikasunduan da ring mamuntukan ing mitalakad metung Visitas, bang mibie ing pamangailangang ispiritwal ding manuknangan keti. Iti ya ing sangkan nung bakit inyang ika 30 ning Nobyembre, 1996, mika ground breaking ban miumpisan ing obra para king pamanalakad kaniting bale pipanalanginan. At king upaya ning Arzobispu ning Arkidiosesis ning San Fernando, I Most Reverend Paciano B. Aniceto, D.D., ing Visitas a meyari, mitalaga yang bilang metung a Parokya lalam ning pamanampun nang Cristo, Ing Mayap a Pastul bilang patrun na niting baryu.
Mayo 18, 1998, iti ya ing opisyal a panahun king pangayari ning pamanalakad king Pisamban, at I Reberendo Padre Juan Danilo L. Dizon ya ing mumunang pari a medistinu kanita keti. Inyang Enero 15, 1999 meganap ing pamamendisyung kaniting parokya lalam ning kayang terminu kasaup ning Arzobispu.
Kayari ning terminu nang Among Dan, inyang Mayo 2002, medistinu neman keti i Reberendo Padre Jesus D. Salvador, ing pang adwang kura paroko. King keyang terminu, mas lalu nang pepalabungan ing kasalpantayanan ding memalen ning Pandacaqui. Ban miras ing Eukaristiya karing tau, mika “Street Masses” karing balang distritu. Kasabe ning pamanyalung ning kasalpantayanan, dininan nala mu naman pansin Amung Jay ring imprastraktura ning parokya.
Inyang Oktubre 2007, medistinu ne man ing katlung kura paroko ning Parokya ning Mayap a Pastul, I Reberendo Padre Mario F. Ramos. King keyang kasuywan dininan nalang pansin ding mapilan pang kakulangan ning parokya, mapilan kareti apin ding; pamanalakad ning Multi Purpose Hall at kampanaryu, pamangumpuni kareng luklukan ning pisamban at bubungan ning rectory, mesali at milage la ring chandelier, miragdagan yang dekorasyun ing retablo, mesali la reng electric fans at bayung generator, melimus la ring imahe nang San Pedro Calungsod, San Lorenzo Ruiz at ing Karosa ning Mayap a Pastul.
PARISH PASTORAL COUNCIL
REV. FR. FERDINAND C. MANGULABNAN
Parish Priest
SIS. RITA TAYAO
PPC President
SIS. MENCY MALLARI
PPC Vice President
SIS. EDNA RODRIGUEZ
PPC Secretary
SIS. MYRNA DEL MUNDO
PPC Treasurer
PARISH FINANCE COUNCIL
BRO. LUCITO LAMPA
PFC President
SIS. MARISSA GARCIA
PFC Vice President & Secretary
SIS. ALMA PAGCU
PFC Treasurer
SIS. FRANCISCA CRUZ
PPC-PFC Auditor
MINISTRY ON LITURGY
BRO. ANDRES VIRGEL SANTOS
BRO. JOHN JERAMY RIVERA
MINISTRY ON FORMATION
BRO. JOHN RYAN AGUILUS
SIS. ANGELINA MACAWILE
SIS. ANGELINA TAYAO
MINISTRY ON SERVICE
BRO. ARIEL PAYUMO
SIS. FILIPAS ALFONSO
SIS. ELISA GREGORIO
SIS. MARIE FABIAN
SUCCESSION OF PARISH PRIEST
Rev. Fr. Ferdinand C. Mangulabnan 2013 – Present
Rev. Msgr. Mario F. Ramos 2007 – 2013
Rev. Fr. Jesus D. Salvador 2002 – 2007
Rev. Fr. Juan Danilo L. Dizon 1998 – 2002